Yera domingu. Mio güela tizaba la cocina y los cristales taben empañaos.

Pal mundu en xeneral, los domingos son díes llargos, ensin planes. Pa mi, ye ún de los díes más importantes y guapos de la selmana. Vuelvo a xuntame cola mio familia, esa parte de los mios xenes que vive cerquina, pero un poco lloñe.

Esi domingu de va yá más de 10 años, mio pá tuvo’l detalle d’entretenenos con dos o tres caxes enllenes de semeyes. Recuerdo que foi una tarde cola mesa rodiada de xente, el sofá nun tenía nengún sitiu llibre y les semeyes pasaben de mano en mano. La risa, les histories, les anécdotes y les persones que yá nun tan, volvieron a esa cocina.

Pa mi la fotografía ye eso. Ye historia. Son alcordances. Ye vida que vuelve dempués d’un tiempu metida nuna caxa.

Yo soi Leti, la fotógrafa de Díes Adulces. La metá de los mios cromosomes son pixuatus y la otra metá, valdesanos. Pero como non siempre la xenética ye too, toi feliz viviendo en Cardes, un pueblín a la vera L’Infiestu, nel conceyu de Piloña.

Entamé a estudiar fotografía en 2011 y, mentanto decidía qué facer con tolo aprendío, fici la carrera de Ciencies Ambientales, investigué y redacté’l TFG dando la teta a la mio fiya.

La maternidá fízome realcontrame cola cámara, cola necesidá de guardar la rapidez del tiempu. Y poco a poco, adulces, fui xestando la idea de crear el mio propiu proyectu de fotografía, onde les madres, la naturalidá y el papel fueran conceptos esenciales.