Con Díes Adulces queden presentes pa siempre los díes de vivir adulces, los díes enllenos d’instantes curtios y de pequeños momentos tan intensos que s’entemecen col añar sele de la maternidá.

Nesti proyectu fotográficu retrato la esencia y la tenrura de la maternidá. Ye un mirar especial hacia los nuestros cuerpos en continua tresformación y al vínculu que tenemos pa coles nueses críes.

Díes Adulces entamó a xestase por esi sentimientu que tenemos les madres d’apaecer poco nes semeyes demientres la infancia de les nueses críes, siendo como somos, les que solemos tar tres de la cámara. Tamién naz de la necesidá personal de ver y enseñar unos retratos más cenciellos, más naturales. Una fotografía onde lo qu’importe seya la felicidá y los detalles.

Sentíame llamada a retratar el día a día, esos momentos que nun vuelven, y a poder ser el vuesu axente esternu, esi axente que vos muestra cómo sois cuando abrazáis o cuando zarráis los güeyos pa dar un besu.

Quiero que reviváis esos instantes íntimos, esos cuidaos de los primeros díes, la sensación de tar en casa. Gústame que vos espreséis de forma natural, como deprendistis, como sois de verdá, como faláis en confianza. Igual por eso esti proyectu naz el día 21 de febreru de 2022, Día Internacional de la Llingua Materna.

… también permiten sentase en compañía, ensin priesa, compartiendo recuerdos y fotos.
Por supuestu en papel, ¿cómo si non? Alrodiu d’elles creáse la maxa: l’arume y el tactu, la contemplación y les histories contaes, y por qué non, el tastu intensu de les vivencies.
Los cincos sentios queden presentes nesi instante.