Con esti reportaxe vamos retratar la esencia y la paz d’esos primeros díes dempués del partu. Un retratu del aniciu de la llactancia, d’eses xornaes tan llargues que se difuminen col tiempu y d’esa tenrura tan especial que se desprende al tener una criatura tan pequeña nos nuesos brazos.

Lo guapo ye facer les semeyes nos primeros 15 díes de la to criatura. Col pasu de los meses vas poder recordar la grandeza de pequeños detalles que pasen desapercibios na nublina de la maternidá recién.

Demientres estes sesiones “Gurbizu” voi tar atenta pa les vueses necesidaes especiales parando si tais cansaes y siguiendo’l ritmu de la criatura. Nesti momentu vital siempre voi ufrivos flexibilidá nos horarios y comprensión a la hora de facer les fotos. Si’l día alcordáu nun vos alcontráis bien, tai tranquiles, ente les dos vamos buscar otru día más afayadizu.

Esta sesión ye esclusiva pa facer nel calorín de casa, ensin prieses y con tola tranquilidá del mundu. Naide tien la casa perfecta, nin ordenada a la perfeición, pero si vivimos nella, sedrá la meyor casa pa nosotres nesi momentu. Namás necesitamos buscar el llugar per onde entre la meyor lluz y la to ilusión por caltener esta etapa tan intensa.

Vamos retratar tolos requexos enllenos de vida, d’oxetos que nos identifiquen xunto con esi ambiente que se respira cuando hai un recién nacíu en casa. Ye emocionante tener un recuerdu gráficu de cómo yera la casa de la nuesa infancia, esa casa que cambia tanto como la nuesa vida, como nosotres.